Liebe Oma,
Über di kannt ma so viele Sochn song, owa wo ma do ufong, des is schwar.
Des wos ins am meisten am Herzen lieg, is Danke song. Oma, danke für ois.
Eigentlich is Danke nu viel zu wenig für des, wos du für ins tu host und wia du für ins do
worst.
Danke fürs Kuscheln und in Orm nemma.
Danke fürs Trost spenden und Tränen trocknen.
Danke fürs Liadl singa, wenn mia beim Schaukeln worn.
Danke fürs Vualesn fu insare Lieblingsbiacha.
Danke fürs bei eich schloffn darfn.
Danke für dei unermüdliche Geduld.
Danke für de Wärme und Geborgenheit, de gonze Fürsorge, Aufmerksamkeit und Liebe, de
du ins gschenkt host.
Danke a für dei immer offenes Ohr und as Mut zusprechen.

Und wos ma natürlich nid vergessen darf, danke für die tollen Leckereien, de du gezaubert
host und de ins nia mit an leeren Magen hoam geah hom loss.
Ugfong fu de Kuchen, sei es Linzer, Käse Sahne oder Roulade. Ins oi homs oiwä so guad
gschmeckt, a wenn du nia wirklich zfriedn worst damit.
As Weihnachtskeksä bochn is im November scho los gonga, dass sich jo jede Sorte ausgeht,
de ins schmeckt. Koana wead Vanille Kipfä mit so a Perfektion mochn, wia du.
Wos Siaß zum Kaffee hod oiwä sei miassn und deswegen host du mit großer Leidenschaft
Marmeladen eingekocht und host dafi de Beeren und Früchte aus dein wohl gepflegten
Gortn heagnumma.
Und fu deine Zillertaler Krapfen brauchen ma gor nid ren ufonga, de worn wirklich bei OLLE
aus da Familie heiß begehrt.
Mit dir hom ma stundenlong spühn kenna und es is nia longweilig wuan, weil Dia is oiwä
eppas neus eigfoin. Toben im Gortn, Mensch-ärgere-dich-nicht, Puppen und Barbies, Moin
und Basteln, tonzn und singa, des ois host du mit ins Enkä fu Herzen gean tu.

Glocht homma mit dia oiwä fü und Oma, des wean mia nia vergessen.
Du bist etz nimma do wor du amoi worst, owa du weast ins etz iwaroi hi begleiten.
Du host ins an da Hond gfiaht und ins zoag, wia schea und wertvoll insa Familie is.
Oma, wos dadn mia gem, dass ma di wieda bei ins do hedn.
Worte kennan gor nid beschreim, wia sehr du ins etz scho fehlst.
Danke Oma, danke fi ois.
Deine Lieblinge, Sarah, Nadine, Helena, Anja und Jonas